बोल चूड़ी बोल कैकी याद मा खणक्णी छै तू
बोल चूड़ी बोल छण छण किले बजणी छै तू

पाणी का बाटा मिली जु क्य वेकि याद कुतगेळी लगांदी
आंख्यूँन सनक्वे जैन क्य वेकि सूरत मनमा प्रीत जगांदी
बोल झुमकी बोल किले हल हल हलकणी छे तू
बोल झुमकी बोल किले झल झल झलकणी छे तू

घुंघरळी लटुली जैकी, क्या वेकी याद बडुळी लगांदी
सुमयाळ जन जैकी कद काठी क्य वेकी खुद तरसांदी
बोल नथुली बोल किले हल हल हलकणी छे तू
बोल नथुली बोल किले झल झल झलकणी छे तू

इंद्र जन छबिलू बैख जु क्या वू त्येरा मन मा बसग्याई
वे वीर भड़ देखि क्य त्येरू सोर तोर सब हरचि ग्याई
बोल बुलाक बोल किले हल हल हलकणी छे तू
बोल बिसार बोल किले झल झल झलकणी छे तू

कृष्ण जन रंग रूप जैकु क्या वू बैख त्वे पराज लगान्दू
कामदेव जन काया जैकी क्या वू मन त्येरु भारमंदू
बोल फोंदी बोल किले हल हल हलकणी छे तू
बोल फोंदी बोल किले झल झल झलकणी छे तू